မြန်မာအပေါ် အမေရိကန် သက်ညှာမှုတချို့

အမေရိကန်နိုင်ငံခြားရေးဝန်ကြီး ကလင်တန် မြန်မာနိုင်ငံကိုရောက်နေတဲ့ ဒီကနေ့ ဒုတိယနေ့မှာတော့ နေပြည်တော်မှာသမ္မတဦးသိန်းစိန်နဲ့ရော အစိုးရအဖွဲ့တွေအပြင် ကိုယ်စားလှယ်တွေနဲ့ပါ တွေ့ဆုံအပြီး သတင်းစာရှင်းလင်းပွဲ ပြုလုပ်ခဲ့ပါတယ်။ ဒီအခြေအနေအပြည့်အစုံကို သိရအောင်လို့ နေပြည်တော်မှာ သတင်းယူဖို့ ရောက်နေတဲ့ ဗွီအိုအေဝိုင်းတော်သူ မစုမြတ်မွန်ကို ဆက်သွယ်မေးမြန်းထားပါတယ်။ ဒီသတင်းစာရှင်းလင်းပွဲမှာ ဝန်ကြီးကလင်တန်က ဘာတွေပြောသွားသလဲလို့ စမေးတဲ့အခါမှာ မစုမြတ်မွန်က အခုလို စပြောပါတယ်။-
သူအရင်ဆုံးပြောတာက အနှစ် ၅၀ အတွင်းမှာမှ ပထမဦးဆုံးလာရတဲ့ နိုင်ငံခြားရေးဝန်ကြီး ဖြစ်ပေမယ့်လည်း တကယ်တော့ အမေရိကန်နဲ့ မြန်မာနိုင်ငံဟာဆိုရင် ဟိုးအရင်ကတည်းက ၂ နိုင်ငံဆက်ဆံရေးရှိခဲ့တယ် ဆိုတာကို အစချီပြီးတော့ ပြောပါတယ်။ တာရှည် မျှော်လင့်စောင့်စားခဲ့ရတဲ့ ပွင့်လင်းမှုတချို့ကို မြန်မာသမ္မတ ဦးသိန်းစိန်ကနေပြီးတော့ လုပ်ခဲ့တဲ့အပေါ်မှာ အမေရိကန်ကနေ ကြိုဆိုတယ်ဆိုပြီးတော့ ပြောပါတယ်။
"မီဒီယာနဲ့ အရပ်သားအဖွဲ့အစည်းတွေအပေါ် ထိန်းချုပ်မှုတချို့ကို ဖွင့်ပေးခဲ့ပါတယ်။ ဒေါ်အောင်ဆန်းစုကြည်နဲ့ တွေ့ဆုံဆွေးနွေးခဲ့ပါတယ်။ ရွေးကောက်ပွဲဥပဒေတွေ၊ အလုပ်သမားဥပဒေတွေ ပြန်ပြင်ပေးခဲ့ပါတယ်။ ခံယူချက်ကြောင့် အကျဉ်းကျသူ ၂၀၀ လောက်ကိုလည်း လွှတ်ပေးခဲ့ပါတယ်။ ဒီလုပ်ရပ်တွေကိုလည်း ဆက်လုပ် သွားမယ်လို့ သမ္မတကြီးက ပြောကြားခဲ့ပြီးတော့ ကျမတို့ဘက်ကလည်း ဒါကို ထောက်ခံသွားမယ်လို့ ပြောကြားခဲ့ပါတယ်"
ဒါပေမယ့်လည်း အခု မြန်မာနိုင်ငံမှာလုပ်နေတဲ့ ပြုပြင်ပြောင်းလဲမှုတွေဟာ၊ စိန်ခေါ်မှုတွေဟာ အများကြီး ရှိနေသေးတာကိုလည်း သမ္မတဦးသိန်းစိန်နဲ့ဆွေးနွေးခဲ့တယ်လို့ ပြောပြပါတယ်။ နောက်တခါ နျူကလီယား မပြန့်ပွားရေးဆိုင်ရာ နိုင်ငံတကာသဘောတူညီချက် ၂ ခုကိုရောပေါ့နော်။ မြန်မာနိုင်ငံအနေနဲ့ အတိအကျ လိုက်နာဖို့လိုတယ်ဆိုတာကိုလည်း သူက ပြောခဲ့တယ်လို့ ဆိုပါတယ်။
အခုလောလောဆယ်အထိပေါ့နော်၊ မြန်မာနိုင်ငံမှာလုပ်ခဲ့တဲ့ ပြောင်းလဲမှုတွေအပေါ်မှာ မြန်မာနိုင်ငံက အသိအမှတ်ပြုတဲ့အနေနဲ့ လိုက်လျောခဲ့တဲ့ အချက် ၂ ချက်ကိုလည်း အမေရိကန်နိုင်ငံခြားရေးဝန်ကြီး ဟီလာရီကလင်တန်က အသိပေးပါတယ်။


ကြာသပတေး, 01 ဒီဇင်ဘာ 2011


http://www.voanews.com/burmese/news/--12_01_11_my_news_burma-----134826548.html